2018-01-09

Xa estamos de volta... e con grandes novidades!

Reamatadas estas vacacións de Nadal nas que puidemos gozar das viaxes, das festas e de moito tempo coas nosas familias, regresamos ao colexio coas baterías totalmente cargadas e con moitas ganas de traballar en novas e emocionates aventuras na nosa escola. E comezamos forte! Nesta primeira xornada escolar na que estreamos ano novo, Iria e Lucía ofrecéronnos unha nova lectura en inglés titulada THE COLOUR MONSTER, coa que gozamos e puidemos ver a destreza que se dan as nosas compañeiras na lingua de Shakespeare. Fixérono realmente ben.
Logo, da man da "teacher" Yolanda e coa inestimable colaboración do mestre Javier, traballamos as expresión inglesas relacionadas coas emocións e estados de ánimo. Foi realmente divertido! 








Por outra banda, cando dicimos que vimos con grandes novidades non mentimos pois hoxe podemos anunciarvos unha das noticias que máis ledicia nos provoca, como é a de que a nosa familia escolar non para de medrar. Diego veu cargado de sorrisos e ilusión para a clase de quinto curso e por iso, neste día tan especial, queremos aproveitar para darlle unha acollida moi agarimosa, como el se merece. Benvido Diego ao noso colexio que xa é tamén o teu. Verás a de aventuras que nos agardan xuntos.



A Festa das Familias e a visita de Papá Noel




Nos meses de novembro e decembro comezamos a preparar un dos días máis especiais para nós dentro do calendario escolar. Aquel no que damos por rematado o primeiro trimestre, que é o máis longo dos tres, e comezamos as vacacións do Nadal. Unha xornada moi especial na que membros das nosas familias veñen pasar a tarde connosco e nós os podemos agasallar cun espectáculo que nos esixe moita preparación, ensaio e estudo, e no que poñemos toda a nosa ilusión e empeño para que sexa do agrado deste noso público tan distinguido. Abaixo deixámosvos algunhas das fotos dos ensaios e dalgunha das actuacións. Tamén grabamos un video do evento que subiremos proximamente. Desexamos que o pasarades polo menos tan ben coma nós e queremos darvos as grazas por vir. 























Despois da festa os sorprendidos fomos nós, pois acudiu ao noso colexio, para repartir regalos e os seus mellores desexos, nada máis e nada menos que... Papá Noel!!! Non sabedes a ilusión que nos fixo! Grazas, Papá Noel!!!





Tarefas de Nadal das Minchiñas e tres lecturas de maiores

E antes dunhas merecidísmas vacacións de Nadal, as nosas Minchiñas mostráronnos as tarefiñas para este tempo de maxia, lecer e tanta festa. Que bonitiños que están!












E como as Minchiñas nos presentaron as súas "tarefiñas" para o Nadal, os maiores non quixeron ser menos e deleitáronnos coa lectura de tres contos relacionados con tres amigos que eles mesmos construíron con materiais de refugallo.  Uxía e Iria léronnos Unha historia robotástica. As dúas Lucías relatáronnos A viaxe espacial de Laica e Adrián e Cristian contáronnos a historia do Robot Tintín. Despois das lecturas incluso houbo tempo para que os nenos e nenas maiores do colexio nos ensinaran o seu baile. Un traballo fenomenal!